ਇਫਕੋ ਨੈਨੋ ਜ਼ਿੰਕ ਅਤੇ ਨੈਨੋ ਕਾਪਰ ਨੂੰ ਕੀਤਾ ਤਿੰਨ ਸਾਲਾਂ ਲਈ ਅਧਿਸੂਚਿਤ
IFFCO: ਨੈਨੋ ਯੂਰੀਆ ਨੂੰ ਲੈ ਕੇ ਚੱਲ ਰਹੇ ਵਿਵਾਦ ਦਰਮਿਆਨ ਕੇਂਦਰ ਸਰਕਾਰ ਨੇ ਇਫਕੋ (ਇੰਡੀਅਨ ਫਾਰਮਰਜ਼ ਫਰਟੀਲਾਈਜ਼ਰ ਕੋਆਪਰੇਟਿਵ ਲਿਮਟਿਡ) ਨੈਨੋ ਜ਼ਿੰਕ ਲਿਕਵਿਡ ਅਤੇ ਨੈਨੋ ਕਾਪਰ ਲਿਕਵਿਡ ਬਣਾਉਣ ਦੀ ਮਨਜ਼ੂਰੀ ਵੀ ਦੇ ਦਿੱਤੀ ਹੈ। ਕੇਂਦਰ ਨੇ ਇਹ ਮਨਜ਼ੂਰੀ ਖਾਦ ਕੰਟਰੋਲ ਆਰਡਰ 1985 ਤਹਿਤ ਤਿੰਨ ਸਾਲਾਂ ਲਈ ਦਿੱਤੀ ਹੈ। ਇਸ ਸਬੰਧੀ ਨੋਟੀਫਿਕੇਸ਼ਨ ਵੀ ਜਾਰੀ ਕਰ ਦਿੱਤਾ ਗਿਆ ਹੈ।
ਪੌਦਿਆਂ ਵਿੱਚ ਸੂਖਮ ਪੌਸ਼ਟਿਕ ਤੱਤਾਂ ਦੀ ਕਮੀ ਨੂੰ ਦੂਰ ਕਰਨ ਲਈ, ਫਸਲਾਂ ਦੇ ਪੋਸ਼ਣ ਸੰਬੰਧੀ ਦੋ ਹੋਰ ਨੈਨੋ-ਤਕਨਾਲੋਜੀ ਅਧਾਰਤ ਨਵੇਂ ਉਤਪਾਦ ਜਲਦੀ ਹੀ ਬਾਜ਼ਾਰ ਵਿੱਚ ਲਾਂਚ ਕੀਤੇ ਜਾਣਗੇ। ਹਾਲਾਂਕਿ, ਇਫਕੋ ਨੇ ਅਜੇ ਤੱਕ ਆਪਣੀ ਬੋਤਲ ਦੇ ਆਕਾਰ, ਕੀਮਤ, ਉਤਪਾਦਨ ਦੇ ਸਥਾਨ ਅਤੇ ਵੰਡ ਦੇ ਵੇਰਵੇ ਜਾਰੀ ਨਹੀਂ ਕੀਤੇ ਹਨ।
ਕਿਉਂ ਮਹੱਤਵਪੂਰਨ ਹਨ ਜ਼ਿੰਕ ਅਤੇ ਕਾਪਰ?
ਜ਼ਿੰਕ ਅਤੇ ਕਾਪਰ ਸੂਖਮ ਪੌਸ਼ਟਿਕ ਤੱਤਾਂ ਦੀ ਸ਼੍ਰੇਣੀ ਵਿੱਚ ਆਉਂਦੇ ਖਾਦ ਹਨ, ਅਜਿਹੇ ਵਿੱਚ ਇਹ ਖਾਦ ਕਿਸਾਨਾਂ ਲਈ ਫਾਇਦੇਮੰਦ ਸਾਬਤ ਹੋ ਸਕਦੀ ਹੈ। ਪੌਦਿਆਂ ਦੇ ਵਾਧੇ ਅਤੇ ਵਿਕਾਸ ਲਈ ਜ਼ਿੰਕ ਅਤੇ ਕਾਪਰ ਬਹੁਤ ਮਹੱਤਵਪੂਰਨ ਹਨ। ਪੌਦਿਆਂ ਵਿੱਚ ਜ਼ਿੰਕ ਦੀ ਘਾਟ ਵਿਸ਼ਵਵਿਆਪੀ ਚਿੰਤਾਵਾਂ ਵਿੱਚੋਂ ਇੱਕ ਹੈ। ਇਸੇ ਤਰ੍ਹਾਂ, ਪੌਦਿਆਂ ਵਿੱਚ ਬਹੁਤ ਸਾਰੀਆਂ ਐਨਜ਼ਾਈਮੈਟਿਕ ਗਤੀਵਿਧੀਆਂ ਅਤੇ ਕਲੋਰੋਫਿਲ ਅਤੇ ਬੀਜ ਉਤਪਾਦਨ ਲਈ ਕਾਪਰ ਦੀ ਲੋੜ ਹੁੰਦੀ ਹੈ।
ਇਫਕੋ ਦੇ ਮੈਨੇਜਿੰਗ ਡਾਇਰੈਕਟਰ ਵੱਲੋਂ ਟਵੀਟ
ਇਫਕੋ ਦੇ ਮੈਨੇਜਿੰਗ ਡਾਇਰੈਕਟਰ ਡਾਕਟਰ ਉਦੈ ਸ਼ੰਕਰ ਅਵਸਥੀ ਨੇ ਇੱਕ ਟਵੀਟ ਵਿੱਚ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ। ਇਸ ਨੋਟੀਫਿਕੇਸ਼ਨ ਤੋਂ ਬਾਅਦ ਹੁਣ ਕਿਸਾਨਾਂ ਨੂੰ ਨੈਨੋ ਤਕਨੀਕ 'ਤੇ ਆਧਾਰਿਤ ਇਫਕੋ ਦੇ ਚਾਰ ਤਰਲ ਖਾਦ ਉਤਪਾਦ ਉਪਲਬਧ ਹੋਣਗੇ। ਇਫਕੋ ਨੈਨੋ ਯੂਰੀਆ ਤੋਂ ਬਾਅਦ, ਇਫਕੋ ਦੀ ਦੂਜੀ ਤਰਲ ਖਾਦ ਇਫਕੋ ਨੈਨੋ ਯੂਰੀਆ ਪਲੱਸ ਨੂੰ ਸਰਕਾਰ ਦੁਆਰਾ ਨੋਟੀਫਾਈ ਕੀਤਾ ਗਿਆ ਸੀ ਅਤੇ ਹੁਣ ਇਫਕੋ ਨੈਨੋ ਜ਼ਿੰਕ (ਤਰਲ) ਅਤੇ ਇਫਕੋ ਨੈਨੋ ਕਾਪਰ (ਤਰਲ) ਨੂੰ ਤਿੰਨ ਸਾਲਾਂ ਲਈ ਨੋਟੀਫਾਈ ਕੀਤਾ ਗਿਆ ਹੈ।
IFFCO got the FCO approval for Nano Zinc and Nano Copper liquids. These nanoformulations would help to address effectively the zinc and copper deficiencies in agriculture, enhancing crop production and crop quality and ultimately reducing micronutrient malnutrition. It is yet… pic.twitter.com/36mGv5fdKX
— ANI (@ANI) May 1, 2024
ਪੌਦਿਆਂ ਦੇ ਵਾਧੇ ਵਿੱਚ ਮਿਲੇਗੀ ਮਦਦ
ਡਾ. ਅਵਸਥੀ ਨੇ ਆਪਣੇ ਬਿਆਨ ਵਿੱਚ ਕਿਹਾ ਹੈ ਕਿ ਜ਼ਿੰਕ ਦੀ ਕਮੀ ਪੌਦਿਆਂ ਦੇ ਵਾਧੇ ਨੂੰ ਘਟਾਉਂਦੀ ਹੈ, ਜਦੋਂਕਿ ਕਾਪਰ ਦੀ ਘਾਟ ਪੌਦਿਆਂ ਵਿੱਚ ਬਿਮਾਰੀਆਂ ਦਾ ਖ਼ਤਰਾ ਵਧਾਉਂਦੀ ਹੈ। ਇਹ ਦੋਵੇਂ ਉਤਪਾਦ ਫਸਲਾਂ ਵਿੱਚ ਜ਼ਿੰਕ ਅਤੇ ਕਾਪਰ ਦੀ ਕਮੀ ਨੂੰ ਦੂਰ ਕਰ ਸਕਦੇ ਹਨ। ਸੂਖਮ ਪੌਸ਼ਟਿਕ ਤੱਤਾਂ ਦੀ ਘਾਟ ਕੁਪੋਸ਼ਣ ਦਾ ਇੱਕ ਵੱਡਾ ਕਾਰਨ ਹੈ, ਉਨ੍ਹਾਂ ਨੇ ਇਨ੍ਹਾਂ ਖਾਦਾਂ ਦੇ ਨੋਟੀਫਿਕੇਸ਼ਨ ਨੂੰ ਇਫਕੋ ਟੀਮ ਲਈ ਇੱਕ ਵੱਡੀ ਪ੍ਰਾਪਤੀ ਦੱਸਿਆ ਹੈ।
Summary in English: After IFFCO Nano Urea, IFFCO Nano Zinc and IFFCO Nano Copper got approval from the Center Government, notified for three years.
